النصائح الذهبية للرزالة الابدية

زائر

السلام عليكم ورحمة الله وبركاتة
الموضوع ده عبارة عن مسلسل علشان اعلمكم الرزالة والعلم اللي تنتفعوا بيه في حياتكم وهنزل بارت كل مده لحد ما تبقوا أخر رزاله جود لك يا جماعه
مع وادي الحب مش هتقدر تبطل رزاله

يلا نبداء
و مع اول الحلقات بعنوان ازاى تكون رزل فى المواصلات

**
لو راكب فى باص أو ميكروباص وجنبك حد نايم اوعى تسيبه نايم كل شوية اقعد
قول وصلنا عشان يصحى مخضوض او اعمل اهبل صحيه وقوله مش انت نازل هنا
بيتهيألى و فى الحاله دى اكيد هيكره ام الصدفه اللى خلته يركب المواصله
جنبك على ام اليوم اللى ركب فيه

**
لو الى جنبك بقا مش نايم متسيبوش فى حاله برضه عيب عليك متجيش هاقولك تعمل
ايه بقا انت تركز على سؤال واقعد اسألهوله كل شوية زى أنت نازل فين طب انت
دفعت ولا لأ لحد ما هتلاقيه فى وقت من الاوقات حدفك من شباك المواصله

** لو قاعد هو جنب الشباك جوه وقالك عدينى قوله رجلى منملة مش قادر وخليه ينط زى القرد أو قوله ماتنزل من الشباك

**
لو انت فى أتوبيس وقاعد على كرسى وجنبك ناس واقفة استمتع بقى وخدك وقتك
اتمطع بقى وقول ياسلام على الراحة الواحد مكنش عارف هيعمل أيه لو مش قاعد
عايزك تخلى الناس كلها تحقد عليك لحد ما الكرسى يتكسر بيك ان شاء الله

**
لو العكس الناس قاعدة و انت اللى واقف بقى اقعد اسأل كل واحد انت نازل فين
واقعد قول بصوت عالى ياجماعة محدش نازل قريب أصل انا عايز اقعد طول مانت
واقف قول كده لحد مايقعدوك و يجيبولك لزق و يلزقولك بؤك عشان ما تتكلمش

**
لما الكمسرى يجى ياخد منك الاجرة هتسيبه فى حاله لا طبعا اقعد اسأله على
تمن كذا مكان يعنى قوله هو لغاية الحتة الفلانية بكام طب لغاية الحتة دى
بكام اسأل على تمن كل الاماكن اللى تعرفها لحد مايقولك ياعم خلصنى رايح
فين قوله مانا عشان ابقى عارف بس وتقل فى العيار يمكن يسيبك ويمشى و تركب
ببلاش يا عم ابسط

** لما الكمسرى يدى حد تذكرة قوله ورينى كده لو سمحت واقعد اتأمل فيها لحد ما صاحبها يزهق ويشدها منك و احتمال يلبسهالك فى وشك كمان

**
فى مفتش بقى ساعات بيطلع يفتش على التذاكر وبيطلع على السريع كده وينزل
أنت بقى اوعى تديهاله علطول كده أزعل منك والله دور عليها ساعة حط ايدك فى
جيوبك مية مرة هيقولك خلص يا استاذ قوله ثوانى كانت معايا والله واقلع
الجذمة ودور فيها وفى الاخر طلعها من بوقك بعد مايكون هو مات من الملل
وقوله مش قولتلك انا فاكر انها معايا

** كفاية كده بقى حرام المفروض تنزل قبل الناس ماتموت منك
أستنى رايح فين أنت نازل عادى كده ولا كأنك رذل ولا حاجة امال احنا كنا عمالين نرغى فى ايه من الصبح
وأنت
نازل هيبقى فى ناس واقفة أعمل نفسك مش عارف تعدى وحاول تجاهد على قد
ماتقدر وتضيع الوقت اللى تقدر عليه لحد الناس ماتشيلك وترميك بعد ماتكون
جبتلهم السكر ورفعت ضغطتهم و ابقى ادعيلى و انت فى المستشفى

الى اللقاء فى الحلقه القادمة بعنوان "ازاى تكون رزل فى الكليه"

خالص تحياتي
وادي الحب

ههههههههههههههههههههههههههه

منظره المزيد

الله يعطيك العافية

هههههههههههههههههههههههه تسلم يا وادى الحب على شوية الرزالة دى ومنتظرين المزيد

ممكن وانتة طالع الاتوبيس ولقيت واحدة حلوة اوى اعدة وانتة واقف قولة ننزل المحطة الى جاية هى تنزل وانتة اعد على الكرسى قمة الرزالة ههههههههههههههههههههههه

تسلم يا وادى الحب

زائر

السلام عليكم ورحمة الله وبركاتة

يسسسسسسسسسلموا الفتاة الحالمة علي مرورك المتميز

مشكووووووووور محمد علي مرورك اللي اضاء متصفحي

دمتم بألف ود
خالص تحياتي
وادي الحب

زائر

السلام عليكم ورحمة الله وبركاتة

و رجعنا تانى يا احلى اعضاء و مع الحلقة التانية من مسلسل الرخامه بعنوان :

ازاى تبقى رذل فى الكلية

** فى الكلية هتقابل صاحبك وهتقعدوا على أى كافيه بقى هيجى الجارصون طبعا مش هتسيبه فى حاله هاقولك انا تعمل ايه سيب صحبك يطلب الأول وبعدين استلم الجارصون بقى واديله نصيبه قوله عندك برجر ؟ هيقولك اه قوله حلو ؟ هيقولك تمام قوله اوك يبقى اكتب واحد شاورمة طب عندك كبده ؟ هيقولك ايوة قوله معمولة ازاى ؟ سيبه يرغى شوية و يقولك على طريقة عملها وقوله فى الاخر انا اصلا مبحبش الكبدة فكك حاول تطلب حاجات غريبة زى سندوتشات حلاوة طحينية على اساس انك فى سجن أبو زعبل أو سندوتشات بيض أو بتنجان أو لبن العصفور أمسك فى الحاجات اللى مش موجودة كلها المهم حاول تجيبله جفاف عقبال ماتطلب اللى انت عايزه و خليه يكره اليوم اللى اشتغل فيه جارصون على اليوم اللى شافك فيه ...

** وأنت بتاكل بقى أتسلى على المخلل اللى مش عاجبك أرمى شوية على التربيزة وشوية على الأرض و شوية على اللى جنبك أنت وذوقك بقى لو معاك كاتشب يبقى اصلى يا معلم مفيش مانع تكتب أول حرف من اسمك على التربيزة و ليه اول حرف اكتب اسمك و رقم تليفونك و الايميل كمان المهم تخليله التربيزة شبه التورتة ومتنساش تعيب على الأكل وأنت بتحاسب وكمان تقول الحساب غالى و انك معتش داخلهم تانى دا ان هو اصلا مقلكش متجيش هنا تانى ...

** فى المدرج أرشق نفسك بين أتنين متعرفهمش وابتدى الشغل بقى أتعامل على إنك صاحبهم من قرن يضحكوا على حاجة اضحك معاهم كده يعنى المهم تركز معاهم كأنك من بقيت أهلهم ولا خلفوك ونسوك أو طريقة تانية أتلكك لكل اللى جنبك كل ماحد ينطق كلمة قوله لو سمحت أسكت عشان أفهم لو مسكتش أنا هقول للدكتور والحركة دى رذلة ومستفزة جدا بس اشطه يعنى

** لو جنبك واحد بيكتب يبقى اتفتحتلك طاقة القدر و مارس هوايتك عليه اقعد اسأله وعطله ومتخليهوش يكتب سطرين على بعض كل شوية اسأله المحاضرة هتخلص امتى ؟ وكل فيمتو ثانية كده اسأله الساعة كام اصل أنا زهقت طبعا هو اللى زهق وطهق من الكلية وبيقول ياريتنى ماكملت تعليم وكره حياته كلها زى باقى الضحايا ...

** عايز تعمل دماغ حلوة روح على شباك شئون الطلبة المهم حاول تعمل أهبل وأنت داخل وعايز تقف أول واحد
هيرجعوك ورا تحاول تقف مكان أى حد وترذل على كله هما أصلا بيبقوا واقفين مش طايقين نفسهم لو واقف تانى واحد كده مفيش مانع تزق اللى قدامك تلبسه فى الشباك الحديد وتقول الله ياجماعة ياللى ورا متزقوش ومن قبل ماينطق ولا كلمة تقعد تقوله خلص يالا عشان غيرك ومتخليهوش يركز مع بتاع شئون الطلبة خالص لما يجى دورك بقى بيبقوا عايزين يخلصوك ويكروتوك واللى واقفين وراك فى الطابور مستنينك تغور فى داهية بفارغ الصبر خد وقتك كأنك بتحجز فى سينما و اسأل أسئلة كتير وكل مايقولك حاجة قوله مش فاهم معلش قول تانى فهمنى أعمل أيه بالظبط لحد ماتشل أكبر عدد ممكن
وبكده يبقى أنت مارست هوايتك وقضيت يوم رذل

الى اللقاء مع الحلقة الجاية إن شاء الله بعنوان ازاى تكون رزل على الموبايل

خالص تحياتي
وادي الحب

ههههههههههههههههههههه ههههههههههههه
حلوه اوي ياوادي الحب الحلقيتن
ومنتظره المذيد منك
تحياتي لك جداااااااااا

زائر

السلام عليكم ورحمة الله وبركاتة

يسسسسسسسسسسسسسسسلمو سهيلة علي مرورك المعطر
بالورد والفل والياسمين
دمتي بألف ود
خالص تحياتي
وادي الحب

زائر

السلام عليكم ورحمة الله وركاتة

اهلا بيكم معانا تانى و مع ثالث حلقات الرخامه و زى ما وعدناكم بعنوان :

ازاى تكون رزل على الموبايل

** بص ياسيدى أنت دلوقتى ماسك موبايلك وبتلعب فيه وبتسأل أى واحد جنبك أو حد متعرف عليه جديد رقمك كام ؟
سيبه يمليك نص الرقم كده وروح مشغل أى نغمة كدا من عندك هو فاكرك بتسجل الرقم أتاريك بتلعب فى النغمات وهو بيملى عالفاضى و فى الاخر يقولك تمام كدا تقوله انت كنت بتكلمنى ؟؟؟ و خليه وشه يحمر من الغيظ ...

** بتاخد الرقم من حد مش معاك رقمه وتقوله قولى رقمك وأنا هحفظه عشان الموبايل فاصل شحن
وشغل الغباء بقى الى عندك كله كل مايقولهولك قوله غلط ومرة كده قولها صح يقولك تمام كده
قوله اشطه يعنى هو كذا كذا وقوله غلط هيقولك يابنى حرام عليك بقى
قوله معلش معلش عشان احفظه بس وسوق الاستهبال لحد ماتحرق دمه و يقولك ان شالله ما عنك خدت الرقم ...

** بتاخد الرقم من حد برضه قوله رن عليا عشان أسجل رقمك أنا حاطط الموبايل فى جيبى بس عامله صامت
ومليهوله غلط بقى هيرن عليك هيلاقى اللى بيفتح عليه ويقوله آلو وقوله معلش معلش مليتهولك غلط
قال يعنى حد بيتلخبط فى رقمه و خليه يشيل حق الدقيقه ...

** طريقة أضمن بقى قعد أخوك الصغير بموبايلك وقوله أنا خارج وأول ماتسمع صوت الموبايل
أتكى على الزرار ده الزرار الأخضر ده ؟ أيوة ياحبيبى الزرار ألأخضر ده وأقول آلو ؟
برافو عليك تعجبنى نصاحتك قول اللى أنت عايزه وأطلع بقى يامعلم خد نمر ناس على قد ماتقدر و
خليك رزل مع اكبر عدد ممكن من الناس و اللى يقولك ما انت معاك رقمى قوله
اصل الموبايل اتفرمت و النمر طارت و كل مرة أخوك يرد وأنت تقوله آآآخ نسيت الموبايل فى البيت
وخليه يشيل بقى ...

** كل ماتتفق مع حد على ميعاد قوله أبقى رن عليا قبلها بنص ساعة عشان لو نسيت بس
وأستناه فى الموعد المرتقب وأول ماتلمح اسمه رد علطول هيقولك بتفتح ليه ؟
قوله فاكرك بتتصل عشان غيرت الميعاد أو مش جاى قولت أطمن بقى بذمتك قولت أطمن و
لا قولت أرذل ماشى ماشى ماعلينا ...

**قول لصحبك هات الموبايل بتاعك هعمل منه دقيقة هيقولك والله ممعيش
غيرها برن بيها قوله ياعم دى مسألة حياه أو موت
وخد الموبايل بقى أتصل بمامتك أيوة ياماما عاملة أيه ياحبيبتى ؟
أنتى عاملة أيه على الغدا النهارده ؟ محشى الله بموت فيه طب وأيه تانى ياماما ياماما ياماما
عفوا لقد نفذ رصيدكم هنا بقا ممكن صاحبك ياخد منك الموبايل و يحدفك بيه لو صحبك بقا معاه كريديت
كتير بقىمفيش مشكله تبقى تخلى مامتك تحكيلك عملت المحشى ازاى لحد ما تخلصله الرصيد و
لو الرضيد ما خلصش ابقى اسالها جابت المقادير منين و المقادير دى بتتزرع ازاى و صباح الرخامه ...

** صحبك بيتصل بس اتأكد انه بيتصل عشان حاجة مهمة عشان ميقفلش السكة فى وشك
وكل شوية قوله خليك معايا كده
أنت رجعت من الشغل يا بابا ؟ طب ماهو من ساعة مانت اتولدت وهو بيرجع من الشغل فى الوقت ده
أيه الجديد يا رزل أرجع لصحبك بقى أيوة معاك طب أستنى أستنى أيه الصوت ده ياماما أنتى فى المطبخ ؟
ماهى طول عمرها بتحضر الغدا فى الوقت ده طبعا الله يكون فى عون صاحبك
اللى مش عارف ياخد منك كلمتين على بعض و فى الغالب هيقفل السكه و يقولك مش عايز من خلقتك حاجه ...
** قول لصحبك حلوة أوى الرسالة دى هنقلها بس طويلة أوى طبعا كلنا فاهمين
أنت بتلمح لأيه يارذل(هو عشان يطلع ذوق معاك هيقولك خلاص ياسيدى أبعت اللى عاجباك دى
(واحدة بس طبعا فهمتوا قصدى من اللى بين القوسين أبعت بقى الرسايل كلها حتى لو فيها كلمنى شكرا
وقوله بصراحة كله عجبنى بس ياخسارة الرصيد خلص كان ناقص واحدة نفسى أخدها و
هنا بقا هيحرم يسيب رسايل عنده على الموبايل منك يا سئيل ...

** أستلم رقم ابعتله كل يوم تلاته كلمنى شكرا ورن عليه كل فيمتو ثانية مرة يتصل بيك
أفتح ومتتكلمش ولا كلمة
آلو آلو آلو رد ياحيوان وأنت باصص فى السما وعامل أهبل خليك كده بقى لحد ما يغير الخط
أو يبطل يشيل موبايلات و البركه فيك بقا يا ملعم ...

** بتبقى اسمها بالعربى ملاحظات ده فى نوكيا(notes)معاك موبايل فيه بلوتوث
وقاعد فى مدرج الكلية أو سينما وكده أفتح الـ
أكتب فيها - فكك منى - وأبعتها لكل اللى فاتحين طبعا أى حد هيستلمها هيقول أيه الرذل ده
أنا يعنى كنت طلبت من خلقته حاجة ...

**قول لصحبك معرفش يا أخى الموبايل بتاعى ماله هيقولك أيه يعنى فيه أيه ؟
قوله رن عليا كده هيرن عليك أتكى على أى زرار فى الموبايل هيقوم فاتح عليه قوله شوفت
بتكى على أى زرار يقوم الموبايل فاتح على اللى بيرن زيك كده(any key answer)
طبعا أنت مشغل خدمة اللى هى خدمة أى زرار يرد على اللى بيتصل بيك وخليته يشيل المكالمة ...

** قول لصحبك حولى جنيه رصيد عشان أرن بيه بدل مانا مفلس يعنى يرضيك كده
ولا هتستخسر فيا جنيه هيقولك لا مش هستخسر بس ازاى ؟ قوله تمام قولتلى ازاى تحولى ستة جنيه
ولما يوصلوا أحولك أنا خمسة جنيه هيقولك ماشى حول بقى يامعلم ولما تيجى
تردهمله هيقولك مينفعش تحول رصيد وأنت رصيدك أقل من سبعة جنيه وخليه يشيل الستة جنيه بحالهم
والطريقة دى هدية منى ليكم ...

و بكدا يبقى كشفنا اسلحة الموبايل الفتاكة و مساء الرخامه يا اعضائنا

و انتظروا الحلقة القادمة بعنوان "ازاى تكون رزل مع صحبك

خالص تحياتي
وادي الحب

زائر

السلام عليكم ورحمة الله وبركاتة

ايه يا جماعه شكل نظام الموضوع اللي ينزل علي حلقات ده مش عاجبكم
كده انا ممكن ابطل انزل باقي البرتات

خالص تحياتي
وادي الحب

» الوصايا الذهبية د ربيع أبو الخير
» النصائح للمحافظه على جمال العينين